Ölkədə hərbi vəziyyət olduğu üçün qələbəni küçədə deyil, evdə qeyd edək » devlet.info.az
Xəbərlər



Ölkədə hərbi vəziyyət olduğu üçün qələbəni küçədə deyil, evdə qeyd edək
Ölkədə hərbi vəziyyət olduğu üçün qələbəni küçədə deyil, evdə qeyd edək

Dünən Ali Baş Komandan İlham Əliyevin Suqovuşanın və Tərtər rayon Talış kəndini, Cəbrayıl rayon Mehdili, Çaxırlı, Aşağı Maralyan, Şəybəy və Quycaq kəndlərini, Füzuli rayonu Aşağı Əbdürrəhmanlı kəndlərinin düşmən işğalından azad olunmasını elan etməsindən sonra paytaxt sakinləri arasında böyük coşğu yaşanıb. İnsanlar qələbə sevincini birgə küçələrdə qeyd etmək istəyiblər.

Lakin Daxili İşlər Nazirliyi vətəndaşlara müraciət edərək onlardan komendant saatının tələblərinə və karantin qaydalarına əməl edərək evlərini tərk etməmələrini xahiş edib.

Bildirilib ki, hazırda respublikanın bütün ərazisində hərbi vəziyyət davam edir və bununla əlaqədar Bakı şəhəri də daxil olmaqla bir sıra şəhər və rayonlarda saat 21:00-dan səhər saat 06:00-dək komendant saatı tətbiq edilir. Həmçinin ölkədə koronavirusla mübarizə məqsədi ilə karantin rejimi tətbiq olunub.

Bu gün Bakıda Post Patrul Xidməti də əhaliyə müraciət edərək insanları küçələrə çıxmamağa çağırıb. Müraciətdə müqəddəs borcumuzun yerinə yetirilməsində həmrəylik göstərib dövlət orqanlarına dəstək olmaq bildirilib.

Prezidentinin köməkçisi – Prezident Administrasiyasının Hərbi məsələlər şöbəsinin müdiri general-polkovnik Məhərrəm Əliyev də vətəndaşlara çağırış edərək onları təmkinli olmağa səsləyib:

“Ordumuz düşmənə sarsıdıcı zərbələr endirir və hər gün müsbət nəticələr əldə olunur. Sözsüz ki, bu qürurverici tarixi anlar bizim böyük sevincimizə səbəb olur, ərazi bütövlüyümüzün qısa zamanda bərpa olunacağı günü yaxınlaşdırır. Lakin, unutmamalıyıq ki, ölkəmizdə hərbi vəziyyət və karantin rejimi qüvvədədir. Vətəndaşlarımızın təhlükəsizliyini təmin etmək məqsədilə xahiş olunur ki, hər kəs müəyyən edilmiş qayda-qanuna ciddi riayət etsin. Bir qədər təmkinli olaq, səbr nümayiş etdirək, Qələbə bizimlədir – Qarabağ Azərbaycandır!".

Qeyd edək ki, hərbi vəziyyət rejiminin tələblərini pozan, komendant saatının təmin olunmasına cəlb edilmiş polis əməkdaşlarının və hərbi qulluqçuların qanuni tələblərinə əməl etməyən şəxslər haqqında hüquqi məsuliyyət tədbirləri görüləcək.
Baxış sayı: 4