44 günlük Vətən müharibəsində qanı ilə tarix yazaraq, şəhidlik zirvəsinə ucalan Azad Elşad oğlu Kərimlinin ad günü Yenikənd kəndində şəhidin məzarı önündə qeyd olundu.

Mərasimdə rayon İcra Hakimiyyətinin başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin böyük məsləhətçi Cavidan Yaqubov, Göyçay rayon İcra Hakimiyyətin başçısının Kürdşaban kənd inzibati dairəsi üzrə nümayəndəsi Pərviz Beydullayev, KİV nümayəndələri və şəhidin ailə üzvləri iştirak ediblər.

Şəhidin əziz xatirəsi ehtiramla yad olunub, məzarı üzərinə gül dəstələri düzülüb.

Daha sonra şəhidimizin evində ehsan süfrəsi verilib.Şəhidimizin qısa və şərəfli həyat yolundan danışılıb.

Qeyd edək ki, Azad Elşad oğlu Kərimli 6 fevral 1997-ci ildə Göyçay rayonunun Yenikənd kəndində anadan olub. 2020-ci il sentyabrın 27-də başlayan Vətən müharibəsində könüllü manqa atıcısı olaraq iştirak etmişdir.Tərtər rayonun Suqovuşan qəsəbəsi istiqamətində döyüş tapşırığının yerinə yetirilməsi zamanı şəhid olmuşdur. 17 noyabr 2020-ci ildə Yenikənd kəndində dəfn edilib.

Xatırladaq ki, Prezident İlham Əliyevin Sərəncamına əsasən, Azad Kərimli ölümündən sonra “Cəsur döyüşçü”, "Vətən uğrunda" və "Suqovuşanın azad olunmasına görə" medalları ilə təltif edilib.